Dorilangan urug‘lik donni maxsus sovitkichli omborlarda saqlash – sifat kafolati

Urug‘lik donning sifati keyingi hosilning poydevori hisoblanadi. Shu bois dorilangan urug‘lik donni maxsus sovitkichli omborlarda belgilangan tartib asosida saqlash muhim ahamiyatga ega. Bunda urug‘lik donning namligi 12–14 foizdan oshmasligi, omborxonalar esa oldindan tozalanib, dezinfeksiya qilinishi, harorat va namlikni nazorat qiluvchi uskunalar hamda shamollatish tizimi soz holatda bo‘lishi zarur. Urug‘lik don maxsus sovitkichli omborlarda +1°C dan +5°C gacha bo‘lgan haroratda saqlanadi. Haroratning keskin o‘zgarishiga yo‘l qo‘yilmaydi. Qoplar maxsus tagliklarga joylashtirilib, pol, devor va shift bilan belgilangan masofalar saqlanishi urug‘likning sifatini asrashda muhim omil sanaladi. Shuningdek, tayyorlangan urug‘lik partiyalarini omborga ketma-ket joylashtirish keyinchalik ularni navbat asosida chiqarishni yengillashtiradi. Har bir urug‘lik partiyasiga ekin turi, navi, avlodi, toifasi, sinfi, partiya raqami, miqdori, qadoqlangan sanasi, dorilashda qo‘llanilgan preparat hamda mas’ul shaxs ko‘rsatilgan yorliq biriktiriladi. Saqlash davomida esa har besh kunda laboratoriya nazorati o‘tkazilib, urug‘likning namligi, harorati, unuvchanligi va fitosanitar holati muntazam kuzatib boriladi. Belgilangan talablarga to‘liq amal qilish urug‘lik donning fiziologik va biologik sifat ko‘rsatkichlarini saqlab qolish, unuvchanligini yuqori darajada ta’minlash hamda kelgusi ekish mavsumi uchun sifatli urug‘lik zaxirasini shakllantirishda muhim omil bo‘lib xizmat qiladi.

Video: https://www.youtube.com/watch?v=dpZuoCXmGEI