Paxtachilikda muhim agrotexnik tadbirlar muhokama qilindi

👥Video-konferens-aloqa shaklida o‘tkazilgan seminarda vazir o‘rinbosarlari, departament va boshqarma rahbarlari, hokimlarning qishloq va suv xo‘jaligi masalalari bo‘yicha o‘rinbosarlari, shuningdek, Qoraqalpog‘iston Respublikasi, viloyat va tumanlardagi fermer xo‘jaliklari rahbarlari ishtirok etdi.

☁️ Yig‘ilishda, avvalo, paxtachilikda ayni kunlarda amalga oshirilishi lozim bo‘lgan agrotexnik tadbirlar atroflicha muhokama qilindi. Jumladan, 1-avgust kuni etefon sepilgan dalalarning bugungi holati tahlil qilinib, erishilgan natijalar va mavjud muammolar yuzasidan fikr almashildi. Mazkur dalalarda keyingi bosqichda bajarilishi lozim bo‘lgan ishlar bo‘yicha aniq vazifalar belgilab olindi.

Shuningdek, etefon nisbatan kech muddatlarda qo‘llanilgan maydonlarning holatiga ham alohida e’tibor qaratildi. Bunday dalalarda defoliatsiya va desikatsiya tadbirlarini o‘z vaqtida, agrotexnik talablar asosida tashkil etish, bunda ekinning holati va ob-havo sharoitini inobatga olish yuzasidan tegishli tavsiyalar berildi.

Seminarda alohida ta’kidlanganidek, bugungi kunning eng muhim vazifalaridan biri — paxtachilikda qo‘llanilayotgan yangi va innovatsion yondashuvlarni har bir fermergacha yetkazish. Chunki daladagi yakuniy natija, avvalo, ilg‘or agrotexnologiyalarning joylarda to‘g‘ri va samarali qo‘llanilishiga bog‘liq.

Muhokamalar davomida kuzgi g‘alla ekish mavsumiga tayyorgarlik ko‘rish, yer maydonlarini ekishga sifatli tayyorlash, shuningdek, takroriy ekinlarning ayni kundagi holati ham tahlil qilindi. Mavjud imkoniyatlardan samarali foydalanish, agrotexnik tadbirlarni belgilangan muddatlarda bajarish va hosildorlikni oshirish bo‘yicha tegishli ko‘rsatmalar berildi.

Seminar yakunida hududlar va mas’ullar kesimida aniq topshiriqlar belgilab berilib, ularning ijrosini ta’minlash bo‘yicha zarur vazifalar yuklatildi.